Muzeu i Edukimit

Ndërtimi i Muzeut të Edukimit ka një histori shumëvjeçare dhe simbolikë të jashtëzakonshme për komunitetin dhe për zhvillimin e arsimit në komunën e Suharekës. Kjo ndërtesë ka qenë shkolla e parë zyrtare. Ajo është ndërtuar në vitin 1928 dhe ka pasur vetëm një kat. Më pas ndërtesa u zgjerua duke e shtuar edhe me një kat dhe si e tillë shërbeu për shumë vite. Kjo ndërtesë shkollore u kthye në një simbol të rëndësishëm të rezistencës dhe rritjes së vetëdijës kombëtare, kulturore dhe shoqërore. Mësues nga Kosova dhe Shqipëria kanë kontribuar për të krijuar dhe frymëzuar një shoqëri të arsimuar, që ka mbrojtur dhe ndërtuar vendin. Struktura në formë kubi, simbolizon rregullin në hapësirë dhe e bën ndërtesën të qëndrueshme. Shtyllat dhe trajektoret konstruktive tregojnë vlera të rëndësishme të tilla si bashkësi, sistem, hierarki, përforcim, inerci, stabilitet dhe strukturë. Kjo paraqitje simbolike përcjell mesazhin se nëpërmjet rregullit dhe sistemit të një shoqërie, që ruan një hierarki të qartë, mund të ndërtojmë struktura shoqërore të qëndrueshme dhe funksionale. Ky objekt ia ka dalë të krijojë një dialog ndërmjet materialeve të vjetra të fasadës ekzistuese dhe materialeve të reja prej betoni natyral. Guri natyral dhe betoni janë dy materiale të forta dhe të durueshme. Dialogu ndërmjet tyre përcjell simbiozën e strukturave arkitektonike të së kaluarës dhe të tashmes, duke treguar vlerën e trashëgimisë kulturore dhe vazhdimësinë e zhvillimit të shoqërisë