Qendra e Biznesit Tirana

“Tirana Business Center“ u projektua për të marrë një rezultat të balancuar midis funksionalitetit, ndryshueshmërisë dhe cilësisë së mjedisit të brendshëm, duke plotësuar gjithashtu konfigurimin e tij të veçantë vëllimor në raport me mjedisin përreth. Zona përmban objekte dy dhe tre kate me funksion shërbimi, ku përfshihet dhe qendra e madhe tregtare TEG. Pozicioni i sheshit të ndërtimit në zonën përballë TEG, bazuar dhe në planin rregullues të Tiranës, ishte i favorshëm për funksionin tregtar të propozuar. Objekti ndodhet në një pozicion strategjik dhe lehtësisht i arritshëm, duke pasur qasje të drejtpërdrejtë nga “Rruga e Vilave” në krahun veriperëndimor dhe rruga “Ligatat” në krahun juglindor. Ndërtesa shquhet për një kompozim racional dhe bashkëkohor. Ajo zhvillohet me dy kate mbi tokë me një lartësi maksimale prej 11 metrash dhe një kat parkimi nëntokë. Disa variabla, duke përfshirë mënyrën e përdorimit, shpërndarjen e ambienteve, rregullimin dhe orientimin e parcelës, kontribuan në konfigurimin vëllimor përfundimtar të saj. Vëllimi i objektit është konceptuar si bashkim i disa kubave të vendosura përgjatë aksit qendror të objektit me shtrirje gjatësore që ndahen ndërmjet tyre nga rripa të zgavruara të vetratave anësore të orientuara nga lindja dhe perëndimi. Kubi ballor me anë të një strehe të madhe në lartësinë e dy kateve në formë portiku, përfshinë vetratën e thyer ballore me hyrjen kryesore të vendosur paralel me “Rrugën e Vilave”. Dy hyrje të çojnë në brendësi të objektit, hyrja kryesore ndodhet në orientimin veriperëndimor dhe dalja në pjesën e pasme. Paraqitja modulare hapësinore plotëson nivelet e ndryshueshmërisë, duke lejuar që pjesa e brendshme të përshtatet me ndryshimet e kërkesës së përdorimit në të ardhmen. Dizajni krijon një tranzicion ritmik të eksterierit në ambientet e brendshme duke përdorur ngjyrat e zeza, teksturën e drurit dhe të betonit.