Xhamia e Ballies

Punimi i këtij projekti është konceptuar me synimin për të sjellë një arkitekturë bashkëkohore, por që me formën e saj të përcjellë mesazhe mbi trashëgiminë traumatike social-politike në vendin tonë, me përgjegjësinë për t’iu qasur të ardhmes të mirëinformuar ndaj të shkuarës. Ritmi i fasadës në raport me dritën, kupola e risjellë përmes mbivendosjes së unazave tetëkëndore, minaret si elemente vertikale, janë konceptuar si interpretime gjeometrike të traditës islame, duke përdorur materiale bashkëkohore. Këto elemente simbolizojnë triumfin e dimensionit shpirtëror, kundrejt shtrëngimeve të sistemeve politike. Konceptimi i hapësirës së brendshme synoi krijimin e përjetimeve që nxisin marrëdhënien ndërmet Qenies njerëzore dhe Krijuesit. Kjo prani është e kontrolluar me kujdes, duke shërbyer si urë lidhjeje midis hapësirës së brendshme dhe asaj të jashtme. Hyrja e dritës është me qëllim ruajtjen e një burimi jo të drejtpërdrejtë, qe thekson ndjesinë për kohën. Ftesa për meditim, përbën aspektin themelor të kësaj qasjeje, duke përfshirë disa nga elementet kyçe në kompozimin e hapësirave të xhamisë. Projekti i Xhamisë së Ballies ishte një mundësi e rëndësishme në zhvillimin e aftësive tona dhe ndërmarrjen e sfidave të mëtejshme në mjedise profesionale, në marrëdhënie me klientë dhe aktorë të tjerë.