Vila A

Vila A është e pozicionuar në një peizazh unik natyror, përballë ishullit të Korfuzit dhe plazheve të Ksamilit. Projektimi i kësaj vile bazohet në konceptin e krijimit të një hapësire qe lidhet mirë me mjedisin e saj përreth, duke përfshirë formacionet shkëmbore dhe pamjet e detit në hapësirën ku jetohet. Vila është pozicionuar duke shfrytëzuar maksimalisht dritën dhe pamjet panoramike. Ndërtesa është projektuar si një grup kubesh me drejtime të ndryshme, të cilat inkuadrojnë pamjet perreth. Kubet që qendrojnë pjesërisht konsol në muret prej guri krijojnë veranda të hijëzuara. Hapësira e jashtme bëhet si një zgjatim i hapësirës së brendshme duke përdorur linja referenciale gjeneruar nga muret e ndërtesës. Këto vija definojnë verandën e jashtme si dhe formën e pishinës. Muret vertikale prej guri dhe kubet e bardhë artikulojnë hapësirën fluide në katin përdhe. Përdorimi i vetratave dysheme-tavan lejon që drita natyrale të depërtojë ambientet e brendshme dhe ofron pamje të pandërprerë të detit dhe peizazhit përreth në të dyja katet e vilës. Të gjitha zonat e ditës ndodhen në katin përdhe. Në katin e sipërm çdo kub përmban një dhomë gjumi, e cila hapet drejt horizontit përmes ballkonit të vet.