Shkolla e Mesme e Muzikës “Halit Kasapolli”

Ndërtesa e shkollës së mesme të muzikës „Halit Kasapolli“, është një shprehje e bukur poetike, e cila me finesë bën lidhjen midis muzikës, arkitekturës dhe natyrës në kontekstin e qytetit të Pejës dhe vendosjes së tij në grykën e Bjeshkëve të Nemura. Pikërisht kjo siluetë e jashtëzakonshme dhe e fuqishme natyrore, së bashku me vizuelizimin e epitomës së muzikës klasike (dhe jo vetëm), kanë qenë frymëzim gjatë konceptualizimit të kësaj ndërtese unike, i shprehur si mishërim i formulimit të njohur të poetit gjerman J.W.Goethe, i cili thotë se “Arti i arkitekturës është muzikë e ngrirë...” për të vazhduar “...gjendja shpirtërore që buron nga arkitektura i afrohet efektit të muzikës”. Megjithëse, për realizimin e projektit ishte në dispozicion një buxhet modest, ai është shembull i veçantë brenda krijimtarisë së AB Group, e cila shtrihet për më se dy dekada.