MALAJ-A Zyrat Qendrore

Duke marrë parasysh vendndodhjen e objektit, objektivi parësor i këtij koncepti ishte ndërtimi i një strukture të re ikonike brenda kësaj zone industriale. Kemi krijuar një formë të pastër kubike të mbështjellë me xham, duke orientuar në 45 gradë boshtet e profileve strukturore të fasadës, për të krijuar një model romboid, i cili më pas u bë elementi kryesor estetik si nga jashtë, ashtu edhe nga brenda. Objekti mishëron një strategji mjedisore shumë progresive, me fasadën e tij të xhamit që mbështjell të tre anët e godinës, duke maksimizuar sasinë e ndriçimit natyror dhe të ajrosjes, si dhe kafazin e shkallës që vazhdon si një atrium deri në tarracë, duke mundësuar qarkullimin natyral të ajrit të pastër. Kjo zgjidhje minimizon në këtë mënyrë varësinë nga ftohja dhe ngrohja artificiale, redukton konsumin e energjisë së ndërtesës duke e bërë atë më të ndjeshme ndaj mjedisit natyror. Xhami përbëhet nga një shtresë e jashtme me xham të dyfishtë izolues termik, që mbron nga rrezet ultravjollcë, ndërsa nga brenda, mjediset janë të pajisur me perde të automatizuara që hapen dhe mbyllen sipas lëvizjes së diellit. Hapësira e brendshme bazohet në parimet e një mjedisi, që ofron një lidhje të fortë me punonjësit e tyre duke harmonizuar botën virtuale, fizike dhe sociale.