Aeroporti Ndërkombëtar i Kukësit

Kalimi i pasagjerëve drejt terminalit, bëhet përmes fasadës veriore (nisjet) dhe jugore (mbërritjet). Të dy fasadat kryesore janë ndërtuar me mure xhami me transparencë maksimale, që ofrojnë pamje optimale nga holli për nisjet apo mbërritjet e pasagjerëve, si dhe një komunikim të harmonishëm me peizazhin e bukur natyror të Kukësit. Ky trajtim gjithashtu ka bërë që të ketë një ndikim minimal të ndërtesës mbi mjedisin, ndërkohë që brenda tij shmang ndjesinë e të qenit i izoluar. Tre janë komponentët kryesorë që përcaktojnë pamjen e jashtme të terminalit të Aeroportit të Kukësit: paretet prej xhami, që ofrojnë një dialog të pandashëm midis pjesës së brendshme dhe të jashtme të ndërtesës, struktura e çelikut dhe çatia e pjerrët industriale. Kjo e fundit përbën një element identifikues për ndërtesat e terminalit të aeroportit, e cila i jep volumetrisë një formë aerodinamike. Ekipi i projektimit u përpoq të sillte në gjuhë arkitektonike, qetësi dhe unitet, ndërkohë që ndërtesa lejon zgjerime të ardhshme, falë modularitetit strukturor të përdorur mbi një skemë të qartë funksionale. Në portofolin e studios sonë të projektimit, Aeroporti i Kukësit zë një vend të veçantë jo vetëm për tipologjinë, e cila ka qenë risi për ne, por edhe për sfidën e madhe të detyrës së projektimit, kur arkitekturës i duhet të japë një përgjigje kundrejt kushtëzimeve tepër strikte funksionale, teknike dhe financiare.