Qendra e Shkollave të Mesme

Koncepti i ndërtimit të “Qendrës së Shkollave të Mesme”, integron një gamë të gjerë funksionesh specifik në një strukturë të përbashkët. Kompleksi i ndërtuar është konceptuar si integrim i tri programeve shkollore, gjimnazit klasik, shkollës së mjekësisë dhe shkollës së ekonomisë, duke i bërë bashkë në një ndërtesë të vetme. Ky konceptim promovon shfrytëzimin efikas të hapësirave dhe rritjen e komunikimit ndërmjet përdoruesve të ndryshëm të ndërtesës. Forma e sheshit të ndërtimit, orientimi i tij, kufizimet me rrugën dhe lumin si dhe peizazhi i fshatit, përbëjnë faktorë që kanë çuar drejt një gjurme më të ngjeshur të ndërtesës. Vendosja e hapësirave të përbashkëta si biblioteka, kantina dhe salla e sporteve në zemër të ndërtesës, ka krijuar qendrën ku gërshetohen funksionet e ndryshme, të cilat nxisin ndërveprimin dhe lidhjen në mes të nxënësve dhe personelit mësimor, duke promovuar bashkëpunimin dhe ndjenjën e komunitetit në shkollë. Përdorimi i palestrës, si element për të kaluar në të dy krahët kryesorë të ndërtesës, është një zgjedhje e zgjuar dizajni që ndihmon në integrimin e saj me pjesën tjetër të kompleksit.