Rezidenca SD

“Residenca SD” zë një parcelë kompakte, shtrihet qetësisht në një lagje të urbanizuar racionalisht në fund të viteve ’70, në periferi të Tetovës, e cila ofron një pamje panoramike drejt maleve të Sharrit dhe shfaq një harmoni midis dizajnit dhe mjedisit. Dizajni i ndërtesës përcjell përmbajtjen dhe kontekstin e saj urban, ku vëllimet e bardha që përmbajnë hapësira të ndryshme grumbullohen për të formuar një strukturë, e cila ndahet me disa thellime, të cilat transformohen në tarraca, ku futen dritaret. Shkallët, si një skulpturë prej druri të vendosura në qendër të objektit, jo vetëm shërbejnë si element arkitektural i bukur, por gjithashtu organizojnë hapësirat në mënyrë funksionale. Kjo zgjedhje e dizajnit paraqet një mjeshtëri në përdorimin e materialeve natyrale dhe në krijimin e një atmosfere të ngrohtë dhe të përshtatshme për banorët. Shkallët e drurit, paraqiten si një bosht për qarkullimin vertikal rreth të cilit organizohen të gjitha hapësirat. Në katin përdhesë ato e ndajnë dhomën e ditës nga apartamenti, ndërkohë që lart ato bashkojnë dhomën e prindërve me atë të fëmijëve si edhe hapësirën e përbashkët në katin e fundit. “Residenca SD” ofron mjedise që pasqyrojnë arritjet jetësore të vetë klientit, duke ofruar strehë të ngrohtë për relaksim si fizik ashtu edhe mendor, me familjen dhe miqtë e tij. Kjo është një shtëpi për familje të përbërë nga tre breza që jetojnë nën një çati, çka lexohet qartësisht nga prerja ku vëllimet e kateve të ndryshme përfaqësojnë paketa të ndryshme përmbajtësore.