Hotel Amber

Projekti i Hotel Amberit ka nisur në vitin 2018 dhe konsiston në ndërhyrjen te një strukture ekzistuese. I vendosur në një largësi më të vogël se 300 m nga deti Adriatik, ai është lehtësisht i arritshëm në një zonë që siguron qetësinë e nevojshme për pushime. Frymëzimi për këtë projekt ka ardhur nga një analizë e kujdesshme e terrenit, me qëllimin e gjetjes së zgjidhjes më të përshtatshme për një zonë veçanërisht piktoreske, ku përveç detit, janë marrë në konsideratë, gjelbërimi i pishave para objektit dhe pas tij një bimësi e ngjashme me atë të shkretëtirës. Kështu, u shtua një sipërfaqe e gjelbër përpara objektit, ndërsa pishina u vendos në pjesën e pasme të tij. Organizimi funksional ka strehuar të gjitha ambientet e nevojshme të hotelit brenda gjurmës së strukturës ekzistuese, duke i kushtuar vëmendje të veçantë orientimit të dhomave nga deti dhe dielli. Në mënyrë metaforike, si referencë për fasadën kanë shërbyer valët e detit, të cilat me lëvizjen e tyre ritmike sigurojnë në të njëjtën kohë edhe qetësi. Në këtë mënyrë është synuar të arrihet një balancë midis funksionalitetit dhe estetikës duke krijuar një hapësirë të ngrohtë dhe mikpritëse.