Kreu
Infinit Plaza
Infinit Plaza
Infinit Plaza
Vendndodhja:Prizren, Kosovë
Tipologji:
Banim, Shërbime
Autor|ët:Gëzim Puka
Viti i realizimit:2025
Bashkëpunëtorët:Fidan Belegu, Blend Nallbani, Fiona Driza, Aida Dobruna, Gjin Puka, Structural Eng.: Misin Misini - IPE-PROING, Electrical Eng.: Gani Latifi - Day Engineering , Mechanical Eng.: Rasim Mjekiqi - Klimaterm Hydro. Eng.: Sokol Xhafa - Xhafa Engineering
Puka Design, e cila u themelua në vitin 1990 në Prishtinë nga dizajneri Gëzim Puka, përfaqëson një nga studiot më jetëgjata të projektimit në Kosovë. Gjatë më shumë se tri dekadave, studio ka zhvilluar një veprimtari që shtrihet nga arkitektura dhe dizajni deri te ndërtimi, mbikëqyrja dhe konsulenca profesionale, duke ndërtuar një portfolio të larmishme ndërtesash me karakter banimi dhe shërbimi, publik dhe private. Në qendër të filozofisë së saj qëndron bindja se çdo vepër duhet të pasqyrojë identitetin e vendit dhe të atyre që do ta banojnë, duke e trajtuar projektimin si një proces interpretimi, ku forma dhe përjetimi hapësinor ndërtohen përmes një bashkëpunimi të ngushtë me klientin.
Frymëzimi për Infinit Plaza buron nga vetë morfologjia e Prizrenit dhe nga rrjedha e lumit Lumbardh, i cili, me kthesat e tij të buta dhe ritmin e pandërprerë, u bë matrica konceptuale e ndërtesës. Lakoret e ujit u përkthyen në një kompozim vëllimor të qetë, ku konturet e fasadës ndjekin një lëvizje organike, duke krijuar një ritëm të vazhdueshëm ndërmjet sipërfaqeve dhe dritë-hijes. Ndërtesa nuk synon të afirmohet si një objekt autonom, por të bëhet pjesë e rrjedhës së qytetit, duke e përvetësuar karakterin e peizazhit përmes një pranie të balancuar dhe të natyrshme.
Shprehja e jashtme e ndërtesës ndryshon vazhdimisht nën ndikimin e dritës dhe kushteve atmosferike. Qelqi, alumini dhe graniti ndërtojnë një lëkurë dinamike, e cila reflekton nuanca të ndryshme gjatë ditës dhe stinëve, duke e bërë ndërtesën të mos perceptohet kurrë njësoj. Kjo ndryshueshmëri i jep veprës një dimension kohor, ku arkitektura nuk mbetet statike, por transformohet vazhdimisht në marrëdhënie me klimën, qiellin dhe ritmin e qytetit.
Për PukaDesign, ky projekt përfaqëson një ndër realizimet ku raporti ndërmjet idesë dhe vendit arrin shprehjen e tij më të plotë. Ai mishëron një mënyrë të menduari ku arkitektura nuk kërkon të tërheqë vëmendjen me forcën e saj, por të ndërtojë një marrëdhënie të heshtur me vendin, duke i dhënë formë asaj që peizazhi dhe qyteti sugjerojnë natyrshëm. Në këtë vepër, arkitektura nuk kërkon të jetë protagoniste, por një prani e qetë që bashkëjeton me qytetin, duke e lënë kohën, dritën dhe ndryshimin e stinëve ta plotësojnë vazhdimisht identitetin e saj.
