Vilë Kolektive Urbane

Objekti ekzsitues mbi të cilin është bërë ndërhyrja, ishte tre kate i lartë dhe me anë të ndërhyrjes është projektuar vila 3, 4 dhe 5 kate, me tërheqje të dallueshme në volum nga kati në kat. Objekti përbëhet nga njësi shërbimi me funksion zyre, të vendosura në katin përdhe dhe njësi banimi nga kati i parë e sipër. Trajtimi i ndërhyrjes, pavarësisht rritjes në volum ka qëne jo invaziv për zonën, në mënyrë të tillë, që objekti nuk e kundërshton situacionin në të cilin ndodhet, por ndërvepron me të dhe është arritur të ruhet pjesë e identitetit, duke u theksuar si pika të forta për ndërhyrjen. Po i referohemi elementit të tullës, i cili vesh gjithë objektin në fasadat kryesore të tij, duke bërë dhe unifikimin e objektit ekzistues me shtesën e re. Këtë element, që e gjejmë herë në dukje, herë të lyer, e herë të suvatuar në zonë, ne e kemi përdorur si element të fortë identifikues të objektit, duke e kthyer në një pikë fokusi në lagjen në të cilën ndodhet. Është marrë ky element dhe është personalizuar në kompozim, në trajtim, dhe në përdorim, në eksterier dhe interier, duke i dhënë objektit një atraksion thuajse simbolik. Kompozimi i thjeshtë midis tullës, xhamit dhe kornizave të zeza metalike që përdoren në fasadë krijon pastërtinë vizuale që e karakterizon objektin, pavarësisht copëzimeve volumetrike.