“Shtëpia me gjak në mure”

Ka vende ku arkitektura nuk ndërtohet për të lënë gjurmën e saj, por për të ruajtur gjurmët që historia ka lënë mbi to. Në këto hapësira, çdo ndërhyrje kërkon përulësi, sepse misioni i saj është ta mbrojë kujtesën, ta bëjë të prekshme dhe t'ua përcjellë brezave që vijnë. Këtë përgjegjësi e ka pranuar dhe zhvilluar Alfa Product, studio projektuese e udhëhequr nga arkitekti Arton Qorri, e specializuar në projektim arkitektonik, dizajn të hapësirave të brendshme dhe zhvillimin e projekteve komplekse të banimit, komerciale dhe urbanistike. Përmes një qasjeje profesionale e cila ndërthur funksionin me estetikën, studioja zhvillon projekte ku çdo zgjidhje arkitekturore formësohet nga konteksti, memoria e vendit dhe përgjegjësia ndaj përdorimit të tij. Koncepti i "Shtëpisë me Gjak në Mure", shtëpi-muze kushtuar Masakrës së Poklekut, u ngacmua nga bindja se kujtesa historike ruhet më mirë kur vendi vazhdon të flasë me gjurmët e tij. Frymëzimi buron nga vetë ndërtesa dhe nga pesha e ngjarjeve që ajo dëshmon. Nën kurimin arkitektonik të Arton Qorrit, projekti u zhvillua mbi parimin e ndërhyrjes minimale, duke ruajtur muret, dëmtimet dhe materialet origjinale, si elemente bartës të memories kolektive. Çdo detaj i shtuar u mendua si ndërhyrje që e respekton gjendjen egzistuese, në mënyrë që vizitori të mos përballej me një ekspozitë të ndërtuar, por me një përvojë autentike që e vendos përballë historisë.