Qendra e Mjekësisë Familjare

Koncepti i projektit “Qendra e mjekësisë familjare” është zhvilluar nisur nga vizioni i krijimit të një ndërtese me prani të fuqishme dhe me arkitekturë bashkëkohore. Përdorimi i materialeve të forta, por të lehta për t’u mirëmbajtur, përbën një aspekt të rëndësishëm të projektit. Synimi i projektit është të ofrojë një strukturë, që dominon zonën dhe të shërbejë si një referencë jo vetëm për arkitekturën, por edhe për shërbimet shëndetësore publike. Organizimi i objektit me një sallë të madhe, që është e hapur ndaj mjedisit të jashtëm dhe me hyrje të kontrolluar për në ambientet e brendshme, është një zgjedhje e përshtatshme dhe e menduar mirë. Arkitektura bashkëkohore e objektit tregon për një trajtim unik të fasadave, duke kombinuar vëllime të pastra dhe kontraste të theksuara, që kanë ndihmuar në krijimin e një pamjeje tërheqëse të tij.