AMC Multimedia

Ndërtesa “AMC Multimedia”, karakterizohet si arkitekturë Brutaliste, një stil që dallon nga përdorimi i bllokut të betonit dhe argjilës për të krijuar ndërtesa vizualisht të imponueshme, që qëndrojnë si simbole madhështore të një mjedisi, me fuqi dhe karakter. Këto dy materiale ndërtimi, janë shprehje e kulturës së ndërtimit të vendit tonë ndër dekada, ku ndërtesat pa fasadë përbëjnë një tipar të përbashkët në të gjithë territorin, duke u bërë pjesë e kujtesës kolektive dhe ndikuar në identitetin e hapësirave urbane. Projekti i ndërtesës “AMC Multimedia” është tregues i një projektimi plot ide, i cili synon të ndërthurë historinë dhe kulturën me funksionin bashkëkohor të ndërtesës. Opinioni kolektiv i përhapur në kulturën tonë, se ndërtesat me fasada të patrajtuara janë të lëna pas dore dhe të krijojnë një ndjenjë vizuale të pakënaqshme, në këtë ndërtesë është shndërruar në një tipar identifikues, duke e ofruar atë në shërbim të komunitetit dhe rinisë për të transmetuar pjesëza të historisë, kulturës dhe mentalitetit midis përdoruesve të saj.