Kreu
Vargu i Blertë
Vargu i Blertë
Vargu i Blertë
Vendndodhja:Sofali, Prishtinë
Tipologji:
Kompleks Banimi
Autor|ët:Arlinda Rushaj Sadiku, Arianisa Shehu Elezi
Viti i realizimit:2020-2025
Bashkëpunëtorët:Armir Krasniqi, Vigan Berisha, Ylber Krasniqi, Pozhegu Brothers
E themeluar nga arkitektja Arlinda Rushaj Sadiku, ERREA Studio zhvillon një qasje projektuese në kufirin ndërmjet arkitekturës, peizazhit dhe dizajnit urban, ku mjedisi i ndërtuar lexohet si pjesë e një ekosistemi më të gjerë. Me mbi pesëmbëdhjetë vjet përvojë profesionale dhe një portofol që përfshin ndërhyrje publike, kulturore dhe urbane, studio i kushton rëndësi të veçantë mënyrës se si njerëzit e përjetojnë dhe e banojnë hapësirën. Përmes bashkëpunimeve me institucione vendore dhe organizata ndërkombëtare, ERREA Studio ka kultivuar një kulturë projektimi që e sheh arkitekturën, peizazhin dhe qytetin si pjesë të të njëjtit organizëm, ku çdo ndërhyrje synon të krijojë vlera të qëndrueshme dhe të lërë gjurmë afatgjata në mjedisin ku ndërhyhet.
“Vargu i Blertë” mori jetë mbi një kodër të pjerrët e shkëmbore, me pamje drejt Parkut të Taukbahçes dhe horizontit të Prishtinës. Fillimisht i konceptuar si një plan urban, projekti evoluoi në një lagje me dyzeteshtatë vila, duke propozuar një model të ri të banimit individual në Kosovë. Koncepti nuk u ndërtua mbi idenë e transformimit të terrenit, por mbi pranimin e tij si partner krijues. Çdo banesë u pozicionua sipas relievit natyror dhe orientimit diellor, ndërsa tipologjitë e ndryshme u përshtatën me konfigurimin e kodrës, duke krijuar një strukturë që rrjedh natyrshëm me peizazhin dhe jo kundër tij.
Organizimi hapësinor ndërtohet përmes një sekuence tarracash, oborresh dhe kopshtesh të vendosura në nivele të ndryshme, ku kufiri ndërmjet hapësirave të brendshme dhe natyrës bëhet pothuajse i papërfillshëm. Prerja vertikale shndërrohet në instrumentin kryesor të projektimit, duke krijuar marrëdhënie të vazhdueshme ndërmjet dritës, ajrit dhe lëvizjes. Materialet natyrore, çatitë e gjelbra dhe përdorimi i tullave me tonalitete të ndryshme ndërtojnë një identitet të qetë dhe të harmonishëm, ndërsa ritmi i stinëve transformon vazhdimisht karakterin e lagjes. Këtu arkitektura nuk përfundon me ndërtimin; ajo vazhdon të evoluojë së bashku me klimën, vegjetacionin dhe jetën që zhvillohet brenda saj.
Për ERREA Studio, ky projekt përfaqëson një reflektim mbi mënyrën se si peizazhi mund të banohet pa u cenuar. Ai lindi nga dëshira për të kuptuar mënyrën e jetesës së familjes bashkëkohore kosovare dhe për ta përkthyer atë në një tipologji banimi që ruan intimitetin, por njëkohësisht promovon jetën në komunitet. Kjo ndërhyrje u shndërrua në një mësim mbi thelbin e arkitekturës: mbi vlerën e qetësisë, rëndësinë e dritës dhe aftësinë e një hapësire për të evoluar së bashku me kohën dhe njerëzit që e banojnë. Në këtë projekt, arkitektura nuk kërkon të dominojë peizazhin; ajo zgjedh të bëhet vazhdimësi e tij.
