TR 721

DARA Architecture është studio projektimi e themeluar në vitin 2020, e ndërtuar mbi përvojën shumëvjeçare profesionale të arkitektes Junilda Karanxha dhe e cila mbart në vazhdimësi ekspertizën e Archistudio. E angazhuar në dizajne të arkitekturës dhe interieri, studio zhvillon projekte që ndërthurin racionalitetin konstruktiv me ndjeshmërinë estetike, duke krijuar hapësira ku funksioni, forma dhe konteksti urban bashkëjetojnë në ekuilibër. Në qendër të filozofisë së saj qëndron bindja se arkitektura është një akt kulturor, i aftë të krijojë identitet, vlera të qëndrueshme dhe një përvojë autentike për përdoruesin. I vendosur në zemër të Tiranës, përgjatë Rrugës së Kavajës, ndërtesa TR 721, me funksion të përzier përfaqëson një interpretim bashkëkohor të tipologjisë rezidenciale urbane. Projekti organizon në mënyrë harmonike hapësirat e banimit dhe ato komerciale, duke krijuar një marrëdhënie aktive me qytetin dhe jetën publike. Kati përdhes shndërrohet në një vazhdimësi të rrjedhës urbane, ndërsa njësitë e banimit zhvillohen mbi të në një organizim që privilegjon komoditetin, privatësinë dhe cilësinë e jetesës. Arkitektura e ndërtesës është konceptuar si një dialog i kujdesshëm me karakterin historik dhe bashkëkohor të Rrugës së Kavajës. Fasada e ventiluar, e trajtuar me tonalitete të ngrohta dhe elemente vertikale ritmike, krijon një identitet të përmbajtur që respekton kontekstin pa hequr dorë nga shprehja bashkëkohore. Hapjet e mëdha dhe ballkonet franceze lejojnë depërtimin e bollshëm të dritës natyrale, duke forcuar lidhjen ndërmjet hapësirës së brendshme dhe qytetit, ndërsa materialet e zgjedhura i japin ndërtesës një prani elegante dhe të qëndrueshme në peizazhin urban.